كان ياما كان في عتيك الزمكان (من جان الرسيفر ب 5 دنانير ونص و من جان البعير همر و من جان الصمون ينباع فل)
جان اكو حاتة اسمها سندرلا خوش حاتة اصيلة و علمودها غنة حسام الاغنية مال العكَربة,,,المهم جان عدها مرت اب كلش خبيثة و جانت تشتغل وية الامريكان مترجمة و ابوها جان خطية يبيع قوايش مبردات حجم 1100 اب عكَد النصارى و احيانا يبيع شخاط فلّ خوش ازلمة جان مال اول ... و جانو الكل سايكَين على سندرلا خطية روحي سوي الجوزة مال مولد فصلت ,,,روحي اوكَفي سرة عال غاز,,, روحي السهام
العبيدي اشتري شحاطات ال خواتج (اللي همة جانو 3 خوات بس من غير اب هم خبيثات للهامة ),,روحي شلعي الشتايكَر مال السطح و رجعية مرة لخ,,,روحي جيبي لفات فلافل مشي,,روحي بدلي الدهن مال المولدة الاقصى كَامت أتكَطع ...و هاي خطية جانت كلش حبااابة و تروح ولا تفتح حلكَها (بس من جواها جان التقسيم مشتغل) المهم,,,,,الى أن يوم من الايام جانت دتصعد ماي اب جليكَان ابو ال 20 (لان الماي ضعيف و الماطور ما ايصعد لان ماكو كهرباء) لكَت بالطرمة فانوس بس شنوو مزنجر و عتيك عبالك جان ابدوائر الدولة و
اتحوسم جتي علية فركتة و "جرررررررب" كَام يطلع دخان سندرلا انرعصت و ازبهّلت و رجعت خطوتين للخلف بسبب المفاجأة حتة اصطمت بالدنكَة(مع العلم انه ما جان اكو دنكَة) و كَالت هاي شنو العالم حتة هنا ايحركَون زبل و تايرات؟؟؟شنو هال دخان هذا؟الدخان شوية شوية اتحول الى جني لابس دريس مال برشلونة و بوتين اديداس وسوار ذهب و حاط معطر "فريدام " كَللها:--
شبيك لبيك عبدك بين ايديك انا الجني "رامي" من العرصات شتريدين اسويلج بس عال سريع لأان ماما دكَتلي مسكول لازم ارجع لان الحليب عالنار
سندرلا جاوبتة-عمو جني اريد كهرباء وطنية 24 ساعة؟(رامي الجني) شنو اني جني لو وزير الكهرباء؟
.زين عمو عمو اريد قنينة مال غاز متروسة لأن امعوزين كلش وصايرة لخة ...
-ولج عمو شنو هال حجي؟ ولج انتي شكَد فكَرية.. اكو واحد يطلب من جني قنينة مال غاز؟ شايفتني رابط الفانوس عال حصان؟
-عمو عمو لعد اشتكَدر اتسويلي؟
-باعي عمو انتي بعدج اصغيرة و محرومة وطايح حظج
الامير راح ايسوي حفلة و ادري عائلتج راح اتروح شنو رايج لو اخليج اتروحين و تتونسين؟ احتمال اتطلعين اب صاية و صرماية لأن الشرقية هم دا اتصور هناك حفلة طاكَة للبنكة بابة
: زين اشون اروح عمو؟نفرات لو كيا؟
-بابة معليج هسة غمضي عينج.... سندرلا غمضت عينها (و من الغريب يا جماعة انه اول ما غمضت عينها ما كَامت اتشوف و هذا الشي محد لكَالة تفسير لي هسة)و "جررررررررررب" شافت سندرلا نفسها لابسة تنورة كصيرة جلد و بدي أحمر و حذاء ينلف عالرجل مفتوح يعني طلعت حااتة (لاء مش ممكن) (الجني زركـَ السهام العبيدي و طق على سريع ورقتين و نص و جابلهيا لأن طلع لوكَي مال حاتات عتيك)
و كَللها الحلفة اقصد الحفلة تخلص بال 8 و نص علمود منع التجول و كل هاي الهدوم راح توكَع و الحذاء و الميك اب و كل
و كلشي راح يختفي اذا عبرت ال 8 و نص و احتمال تنلعسين بالطريق ويخطفوج
-حاضر عمو شكرااااااااااااااااااااااا(هاي شكرا الطويلة مال الزعاطيط)
وصلت سندرلا البيت الامير جان امسوي حفلة لان طلع 77 بالسادس حيروح اهلية احتمال او طب بيطري "بعد ما اعرف" و الحفلة جان بيها نجود و سمراء و ساجدة عبيد والدلوعات ودالي(كلها هجع و شعر شعر و عالكة) و سهام السبتي و غزلان همين جانوا موجودين و الامير شاد الرباط علة راسة و امقندل و صاير طلي من الشرب وصايرة ردح لليافوخ و فجأة الامير صاد سندرلا و عجبتة و كَابلها جتف ساعتين ونص و ساندرلا نست روحها و نست الكراب و السراوات و البهذلة و نزلت ردح الى ان صارت 8 و نص ......الله...الله ....الله
انلاصت اتذكرت الوصية مال رامي الجني و كَالت لازم اشطح و ركَضتلك عال سريع جنها برازلي هسة امجفتة و الامير وراها
-وج تعاااي شبيج اتخبلتي؟مو دا احاجيج ؟؟؟ ولج وين امولية ؟؟؟ فضيلة.. صبيحة.. سعيدة (هلكَد ما سكران نسة اسمها)المهم ركَضت سندرلا و "جررررررررررررررب" وكَع الحذاء مالتها بلا ما تدري جان الامير ايشيل الحذاء و لزمة و ضل صافن على العالم اللي انتبهو على اللي صار و كَاموا ايباوعون على الامير هوة بقة شايل الحذاء و
مصدوم و صورة سندرلا الحلوة اببالة,,, الحفلة اتوقفت طبعا و العالم سكتت من المفاجأة
: جان ايباوع الامير على العالم ....صنطة.......و كَال للناس :
الشركة العامة للصناعات الجلدية: فخر الصناعة الوطنية العراقية خبرة و تميز في مجال المصنوعات الجلدية من الأحذية و الحقائب بأرقى المواد الاولية الفرع الرئيسي :الكرادة قرب جسر ابو الطابقين
[hr]